Tō͘-tēng Hóe-ke
Tī kū-nî kám-un-cheh chêng kui-kang-á, thiⁿ-khì hut-jiân kan piàn kah o͘-thiⁿ tē-àm ,hong-hō͘ chiap-sio̍k saⁿ-mê saⁿ-ji̍t lóng bô-thêng, un-tō͘ chha-put-to lóng tī chi̍t-nn̄g tō͘, kôaⁿ kah sih-sih-chùn kha-bóe chhiú-bóe sī léng-ki-ki , si̍t-chāi sī iau-siū kôaⁿ. óng-nî m̄-bat ū chit-chióng chêng-hêng.thiⁿ-khì piàn bái liáu-āu, chhù--nih cha-á-lâng chhoân àm-tǹg kái chia̍h hóe-ko ,an--ne khá hó liāu-lí mā khá-sio khá-bē-kôaⁿ. tē-saⁿ mê-hng chia̍h sio-chiú ke, goán-bó͘ kah góa kóng che sio-chiú ke sī iōng Tâi-oân bí-chiú-thâu--á choân-chiú lōe-khì chú--e, bo̍k-koài hiah-nī-á phang , thng sī kam-tiⁿ-á kam-tiⁿ, chi̍t-ē lo̍h-âu kui seng-khu lóng sio-khí-lâi.
Chia̍h-pá-á lûn-tio̍h góa sé-óaⁿ , gún súi-bó͘ phâng chi̍t-pôaⁿ i ka-tī chò ê tiⁿ-lō͘ koh choaⁿ chi̍t-kò͘ kiuⁿ-bó-tê tī thiaⁿ-á-keng te tán góa, bô-êng sòa gún nn̄g ang-á-bó͘ chē-loăi hioh-khùn, chia̍h tiⁿ-liāu hah kiuⁿ-bó-tê,ba̍k-nih-á tō káu-tiám khóng-á , tī chit ê sî-chūn, tī khiā-thang hia nā-ū lòng-thang ê siaⁿ , góa ê khan-chhiú koe hian-khui khă-tián , goân-lâi sī chi̍t-chiah niau-á ,chē-tiâu-tiâu nn̄g-lúi ba̍k-chiu kim-kim khòaⁿ , gán-sîn iu-chhiû khó-liân , chhin-chhiūⁿ teh thó kiù-miā, tōa-bi-lú thê àm-tùn chia̍h-chhun--ê ke-bah,thiah-chò bah-si hō͘ i chia̍h , koh khǹg chi̍t-ê chóa-siuⁿ-á hō͘ i bih-kôaⁿ. hó-li-ka-chāi, keh-tńg-kang thiⁿ-chheng chhut tōa-ji̍t , chái-khí beh chhut-mn̂g ê sî ,khòaⁿ i chē-tī chóa-siuⁿ-á téng teh pha̍k-ji̍t-thâu hang-sio.
Lâi-kàu Kám-un-cheh chit chi̍t-ji̍t ê boeh-táu--á sî , tī chhù-āu hi-să-sì ē-bīn , te hō͘ niau-á bih-kôaⁿ ê chóa-siuⁿ-á piⁿ ,Khòaⁿ tio̍h chi̍t-chiah sí-giān-giān ê Tō͘-tēng, goán-bó͘ kong i ū khòaⁿ tio̍h hit-chiah niau-mi kā lâi--e,góa kong hit-chiah niau-á hop-tio̍h Tō͘-tēng ka-tī m̄-chia̍h nih, góa ê khan-chhiú ìn góa kong lí kam m̄-bat thiaⁿ-kòe niau-mi ē pò-un. góa sī te siūⁿ kong niau-á káⁿ ē chai-iáⁿ kin-á-ji̍t sī Kám-un-cheh? koh kā Tó͘-tēng tòng chò Hóe-ke lâi sòng-lé?
